rueпортал словник ґазета ґраматика

85 рокув Володимиру Біланину

85 рокув Володимиру Біланину

У подкарпатському русинському двиганьови за тоты рокы, што у ньому участвову, видів им вшиляку челядь. И тому маву фест примірув, абы дашто поруняти й проаналізувати. Єдно можу вповісти, што мало є такых: успішных, реалізованых и знамных – котрі суть туй, у русинському двиганю, просто так: не претендувучи ни на котрі матеріалні выгоды, ни на якоє главенство в русинських організаціях.

Они туй, бо так велить їм совість, бо у сьому видять своє призначеня. А вже докус єдиниці – се тоты, што мали вшиткы блага и визнаня поза русинством и прийти діла них сюда, ги рахувуть русинофобы, меже нас – «нетрибув и дилетантув», означало, спустити ся на самоє дно, змаргіналити ся, айбо они се зробили. Такый крок у бук свого обездоленного народа вчинили в свуй час Адолф фон Добрянський и Михаил фон Висаник. У наш час можу сміло назвати такой такого «русинського декабриста» – Володимира Федоровича Біланина.

Про Володимира Біланина розказав ми першый раз прощун бы днесь Иван Петровцій. Перебиравучи русинські книжкы у його «Бовті», сперим позур на тому, што многі з них профінансовані за участи В.Ф. Біланина. Иван Юрійович накурто розказав, же Володимир Федорович у минулому директор Ужгородського дослідно-експериметрального завода нестандартного обладнання.

Исе быв завод у обласному центрі, при котрому вже товды фунговав народный фолклорный ансамбел на 120 участникув. Коли зачався третьый русинськый ренесанс, то Біланин поддержав го нараз, ищи товды, у 1990–1991 рр. выводячи под урядову будову днешньої обласної державної адміністрації свойих робочих, абы одстояти позицію свого народа. А на днесь вун пенсіонер, котрый довгый час подпорує русинськоє двиганя, фурт жертвувучи свої гроші и притягувучи сюда фінансы спонсорув. «Майже ани єдна русинська книжка не выйшла без участи Біланина», – констатовав товды Иван Юрійович.

Пуздніше, познайомивши ся з Володимиром Федоровичам и розпозеравши го май скрупулозно, я не лем удостовірив ся в правдивости слов Петровція, а и врозумів им, што челядника великим роблять не гроші й посады, а сила духа, внутрішня велич, ставленя до себе й другых. Именно, такым – великим Русином-чоловіком є Володимир Біланин.

Днесь, 9 апріля, русинському активісту й меценату Володимиру Біланину виповнює ся 85 рокув. У сесь день хоче ся поздравити Ювіляра и пожелати му здоровля и серенчи на многая и благая літа!

Далші статї из катеґорії Даты читайте за удкликованьом
Реклама