Minecraft бізувно не мусай даяк розсягло представляти. Дако го бавив, дако го бавит а дако го знає ги тоты «чудні коцкы-кубикы», из котрыма ся «фурташно унаджит» дїтвак їм на компютерови вадь телефонови.
Компюторні бавкы сут важнов частёв жывота днишнёї молоджавы и сьме раді, ож и наш портал приспів ид тому, убы руснацька бисїда ся стала повноцїнов частёв популарного у молоджавы Minecraft’а. Исе є первый трафунок, кой ся наш язык дустав у даяку бавку и хотько си го годен уключити у штімованю. Первый, и віруєме, ож не послїдньый. У нашуй сітуації, кой из каждым роком вєдно из чилядёв умерат и якась часть нашуй бисїды, мусиме хосновати вшыткі доступні нам можностї, убы тоту смутну тенденцію убернути у лїпшый бук. Мусиме хосновати а шырити нашу материнську бисїду и у діґіталнум світови, бо тото є добрый способ, як ю розшырити межи май молоду чилядь, без котрої хотькотра бисїда умре.
Як ся товмачило
Проєкт товмаченя достигав довго, хоть и муг быти реалізованый щи у 2019. роцї, кой сьме первый раз провбовали уйти на контакт из розробниками бавкы. Тогдышня провба ся убстала проіґнорованов, за што сьме дниськы иппен раді, бо сітуація из даяков літературнов нормов пудкарпатьского руснацького языка тогды была щи май запутана и неєднотна, хоть и дниськы у цїлому ся не онь силно поміняла, айбо маймало зрушыла из міста.
Друга габа ся зачала у новембру 2021. рока, кой сьме раз наново попровбовали контактовати розробникув, и притум сьме зачали розроблёвати концепт товмаченя, котроє сьме плановали шырити мануално помучов так званых «комлетув ресурсув», котрі позволявут управлёвати файлы бавкы так, ги бавлячови парує.
Сякым способом была потовмачена безмала половка бавкы, и видїло ся, ож нашоє внесеня изясь буде проіґноровано. Айбо так, ги Буг любит тройцю, так и пусля тритёго письма сьме дустали скору позітивну удповідь. Руснацька бисїда была додана на товмачську платформу, и убставало ся «маймалоє» — потовмачити бавку.
Дякувучи як уже потовмаченым шорикам тай напорови окремых членув товмачського тіму была бавка за удносно куртый час потовмачена, тай офіційно зашорена межи пудпоровані языкы. Каждый, ко має дяку, си годен у штімованю бавкы покласти руснацькый язык. Віриме, ож сякым способом ся нам удасть холем крыхту заінтересовати и май молодоє поколїня, и убернути позур їм и на їх рудну материнську бисїду.
Указкы из бавкы
На кониць хочеме подяковати вшыткым, ко даяк помуг радов вадь участёв у діскузії, и окреме дякуєме сим людём, котрі майчитаво приспіли ид товмаченю:
@drachynolublu
Бетярьськоє