Товмаченя дописовач Telegram

Telegram є межиплатформовый дописовач, котрый динь-у-динь хоснувут міліоны чиляди по цїлому світови. Майхоснованым ун є у Восточнуй Европі — а завто го часто хоснувут и Руснакы из Украины.

Єднов из лїпшин Telegram’а є можность потовмачити інтерфейс аплікації на хотьяку бисїду хоснувучи спеціално розроблену пуд то платформу — translations.telegram.org. У Telegram’ови хочут, убы їх продукт мав камай шырокый досяг и быв ладный на хоснованя камай шырокому кругови хосновачув, завто давут можность вшыткым охотным товмачити їхньый дописовач як ся їм залюбит.

Исю можность сьме не могли не схосновати — пустили сьме ся до товмаченя и по русинськы.

Наші сили сьме сконцентровали на товмаченю аплікації про направы на сістемі Android, котрых є майповно. Тоту верзію сьме были дотовмачили на 100 %, айбо Telegram ся непрерывно убновлює а дустає нові функції, котрі тоже треба товмачити. Тото ся чинит из рузнов періодичностёв, завто ся уровинь потовмачености находжує булшый час на 90+ %.

Притум ся, кой нам позволят час, товмачат и другі верзії Telegram — про iOS, Windows вадь MacOS.

Кидь уже маєте Telegram а хотїли бы сьте си захосновати нашу бисїду, та доста перейти за удкликованём — t.me/setlanguage/rusyn