Днесь Перша Пречиста

Карпаторусины издавна ділять релігійні сята за свойов класифікаційов. За сьым діленьом маєме три Спасы и три Сяті Марі. Перша Сята Маря – Успіння Пресятої Богородиці, 28 августа; Друга – Руздво Пресятої Богородиці, 21 септембра; Третя – Введеніє у Храм Пресятої Богородиці – 4 децембра.

Перед Першов Сятов Марьов (вадь Першов Пречистов) пройшов майкуртый з чотырьох ручных постув – пуст Успенськый–Богородичын. Ним наші предки готовили себе до єдного з майбулшых сят – Пресятої Богородиці и єї Сятого Успіня.

Сятоє Успіня Пресятої Богородиці

Колись быв сохташ у сесь день осячовати в храмі всякого роду зіля. Старі жоны вліті збирали цілющі травы, які потому приносили од церкві діла осяченя. Сесі рослины хосновали ся діла ліченя вшилякых хвороб. Вподовж століть предкы поклоняли ся култові Пресятої Дівы Марії.

Хоть сято Успіня нагадує вірникам про смутноє дійство смерти, айбо його односять од радостным сятам. Припадать оно, ги вже писали сьме, на 28 августа. Престольні сята в сесь день супроводжували ся особов церковнов урочистостьов. Майнаперед, проводило ся масовоє одпущеня гріхув (сповідь, причастя), дале, одбывало ся урочистоє богослужіня, якоє одправляв єпископ вадь ткось из числа верховного духовенства. Послухати “Божоє слово владикі” приходили майже цілыма селами з разных кунцюв Єпархії.

По Першуй Пречистуй зачинало ся «першоє бабиноє літо», котрых за народным сохташом такой три.