Зачаткы карпаторусинського спортованя – перві крокы | часть ІІ.
У первуй части нашого серіалу сьме ся старали приблизити читачови темы, за котрі будеме писати у сюй и далшых частьох серіалу «Спортованя на Пудкарпатськуй Руси». Писали сьме за докус перві крокы спортивного живота на Срібернуй земли, а типирь уже май зблизька побзераєме на то, што ся робило на самых спортивных полях, опишеме ті знамі спортивні дїйства, котрі до днишнього дня рахувуть ся важнов капітолов у історії чехословацького спорту. Гойра!
Раз лем поєден
До половкы двадцятых рокув ся формовала тварь чехословацького спорту у традичных зимльох чехословацької державы. На Пудкарпатську Русь ся подобный процес дустав крихту май пузно. Уже сьме писали, ож первыми, тко зачав практиковати спортнивну активность на Пудкарпатю были міґранты з Чех и Словакії. Тому и первый клуб з пудкарпатськых зимиль, котрый выграв офіціалный трофей быв I. ČsŠK Ужгород, у котрому векшына бавячув былы з шорув чиськых міґрантув. Сись ужгородськый клуб у 1921. роцї выйграв майстровство восточнословацької жупы, до котрої тогды западала и Пудкарпатська Русь. У фіналї того року переиграв кошицькый I. ČsŠK. Його лїпші бавячі пак, у 1925. роцї, переишли у тогды лем заложеный клуб «Русь». СК Русь ся на довго став русинськов фотболнов вітрінов. Карпаторусинськым фотболным талантам было гибы предопредїлено носити на собі якраз зеленобілі фарбы “їхнього” [карпаторусинського] клубу (політик а спувзаложник клубу Едмунд Бачинськый то докунця прилюдно выголосив на стрічі веденя клубу).
Фотболішты ся одважавуть на репрезентацію
Нароставуча кулкусть фотболных клубув, котрі были валовшні рувняти ся за моцов а спортивнов уровньов клубам из другых чехословацькых земель, привела пудкарпатськых фотболіштув а фотболных функціонарюв ид думкам, ож и Пудкарпатська Русь заслужила мати свуй репрезентачный тім. Ож и Руснакы годни мати фотболну репрезентацію свого наруда, бы поміряти свої силы из загатарными репрезентаціями. Тов добов Чехословацька фотболна асоціація вчинила вшелиякі нарудні фотболні союзы – Чиськый, Словацькый, Нїмицькый, Польськый, Мадярськый, Жидувськый и Пудкарпатськый [Карпаторусинськый]. Позволяла їм як репрезентовати свуй наруд як на державных а загатарных перемаганьох, так и орґанізововати вшелиякі спортивні дїланкы а акції. Свою асоціацію Руснакы вчинили сереґд лїта 1931. року в Ужгородови. Ужгородська «Русь» выйгравала на руснацькуй земли вшытко за шором, тому ни было нич чудного на тому, же якраз її фотболішты творили заклады репрезентаційого тіму. Дїля СК «Русь» звіданка перед зачатком перемагань была ни “ци выйграєме?” а “кулко выйграєме?”. Превосходство ужгородського клубу было замітно на первоє никаня. Якраз тов добов їх тренїровав первый їхньый професіоналный тренер Ян Росі – у минулости фотболішта бырнинськых «Жідениць».
Главный фотболный клуб Пудкарпатя – СК «Русь» Ужгород
