Великодный шовдарь – верш за руснацькых Великдинь

Презентуєме Вам верш знамого руснацького писателя Володимира Рошка за великодный шовдарь.

Великодный шовдарь

Майвеселоє в руснаку,
Што наднимать файну дяку –
То Великодньом ся кличе!
В черевах пічунков миче.

Великодный сьись сохташ
Тримлеся руснацький наш:
Воскресіня восхвалили,
Кошары ся посятили.

Думу вшыткі утікавуть,
Бо їх шовдарі чекавуть.
Пела сята Воскресіня,
Шовдаря Благословіня

В Пудкарпатю ся сяткує.
Руснак з дяков мулатлує.
Шовдарь, то про нас сятоє,
Черевам страх дорогоє.

Свинська лаба закурена,
Сперед сятками зварена,
Смак божественный дарує.
Пахне так – Європа чує!

Руснак шовдарь рук чекає,
Слина, гі у пса стікає…
Ту є шовдарь, на столі,
Хаплють старі ай малі.

Мнясо вкусять, запнуть зубы,
Суль на собі чувуть губы.
Чамкаш – то є райський смак.
Так благує наш руснак.

До вечера шовдарює,
Нич не видить, нич не чує.
Сесе празник, сесе ай!
Завтра воду зачиряй,
Дівок вшытких поливай.

ХРИСТОС ВОСКРЕС!

позерайте далше: вінчовалны образчикы ид Великодню