Курта історія: село Лопушанка

Писав им про Черник, а из Лопушанков аналоґічна ситуація. Историчных данных фактично ни є. У разных жерелах споминат ся 1645. рук, ги рук, кой ся споминат село, айбо пудтвердити’м исе ни годен.

У 1765. роцї Лопушанка туй Черник споминавут ся, ги хуторы Стройна. У архівных данных село ся споминат ги «Lombos (Brusztópatak, Brusztov)».

У 1791. роцї греко-католицькым священиком став Иван Мигович, котрый вів службу и жителям Лопушанкы. У 1797. роцї у селі жило 14 чоловік.

У 1786. роцї у Лопушанцї были три хыжі, жили там три родины. Вшитко людий было 21. 1. чоловік ни быв офіціально зареґістрованым. За сімейным станом 4. были женаті, 6 ниженатых.

Як ся міняла людность?

У 1869. роцї жило 60 чоловік, а пак по роках:
– 1880. – 47. чоловік;
– 1890. – 71.чоловік;
– 1900. – 72 чоловік;
–1910. – 87. чоловік

У Лопушанцї, за вшиткый час, євреї ся ни посиляли (офіціально).

Верну ся до перепису 1880 року.

За результатами вшитко людий было 47, 44 из них Русины, а троє мадяре, айбо за релиґіозными даными, вшиткі 47 чоловік были греко-католиками. 16 людий Лопушанкы были писемнї.

Но были пак и католикы. У 1910. роцї быв записанный єден католик, у 1930. – 4 католикы и єден из яковсь иншов, у 1941. – 6 католикув.

У 1930. роцї, из 141 чоловік 47 были ниписемнї, а 38 кунчили хыба єден класс. 18 чоловік выдходило 4 класув, 28 – 6 класув, 8 – 8 класув, а 2 дїти кунчило 4 класы старшой школы.

У 1941. роцї у селі было 6 католикув и 167 греко-католикув. Быв туй єден словак и 2 мадяре. Чилядь ходила у цирьков до Стройна (так и чилядь Черника). У церковных метриках греко-католицькой церквы Стройна, записовали ся вшиткі хрещенї, вінчанї и умерші из Лопушанкы. Айбо выд 1926. року, у центрі села, была звунниця. Звун выдлила ужгородська фірма «Акорд». На звонї пише: «БОЖЄ! СОХРАНЫ НАШОЄ СЄЛО ОТ ВСЯКЫХ БІДЪ»

У сись час село было выднесено до Довжанського окружного нотаріату, Свалявського округу.

У языковому переписї, люди указовали рудну бисїду и иншу котру знавут. Результат: мадярська – 5, нїмицька – 3, словацька – 1, русинська – 172.

Сякі історичнї данї про Лопушанку. Мало іх, айбо исе є історична правда, котру маєме тямити, бо и наші малі села мавут велику цїнность!

За одкликованьом – далші матеріалы из ціклу «Курта історія»