Епідемії через антисанітарію – маларія 1934–1937 рокув
Днись майважна проблема нилише у нас, ай и у вшиткого світа, пандимія хвороты Covid-19. По разному ї кличут и коронавірус, и усяко инак, айбо ото суть ни мінят. Вірус, котрый ся зародив у китайському Уханї, типирь ся пруйшов по цілому світу и заражат чим дальше, тым бульше чиляди.
За офіціальными даными, появив ся вун через антисанітарію, яка была на базарі, де продавали усячино, що китайці хоснувт на фрыштик и обід. А ото дуже разна звірка, гыды, рыба и инше. Передав ся вірус чоловікови выд літочої мыши, котра была приготовлена ци то у левишови, ци то у якуйсь инчакуй страві. И пак дальше пушло зараженя выд чоловіка до чоловіка.
Про коронавірус Covid-19 ни буду розписувати, бо усяды за нього говорят тай пишут, та точно усї знавут симптомы тай методы, як ся сокотити. Тай уже, перебачте, лиш споминок за нього, вызыват у ня рвотнї рефлексы. Но хочу написати за ото, що, як я сам думаву, робит кажду страшну епідимію якойсь хвороты – антисанітарію.
Заступник міністра охороны здоровля КНР, мав выступ, де говорив, ош исе ниу первый рас, на сякому базарі, появлят ся вірус. Додав, ош там велика антисанітарія и китайська власть, мусит усіма силами старати ся закрыти на території КНР вшиткі подобнї базары. Мушу додати, ош у случаї ипен сього нового корона вірусу, є ищи доста много усяких вирсїй появы, як біоатака США по Китаю, вірус «утік» из тайных лабораторій Уханї и так дале. Айбо я туй буду роззирати лише основну вирсїю.
Убы пудтвердити свої думкы, хочу навести приклад епідимії малярії у нашому краю, у 1934 році, котра тяжко яла ити на спад лиш у 1936-му. У мадярському журналі «M.T.I”, за 17 септембер 1937 року, подає ся новость адресована из Прагы. Дохтор Дрбоглав, руководитиль діагностичного отдїла у державному інститутї здоровля, опубліковав досліды по пуслідньому случаї розвою малярії в Подкарпаті, у журналі чиськых дохторув. Там вун обьяснят, ош хотя малярія раньше ширила ся лиш на южнї районы Карпат, недавно из 1927 року, окрум гур, она ся поширила по вшиткуй країнї. У 1926 роцї было зареґістровано лише 172 случаї малярії, айбо у 1934 роцї, в Подкарпаті зачала ся епідимія и было зареґістровано 3 857 случаїв малярії. Кроме всього, исі случаї были дуже тяжкі, и пошти усі летальнї. У 1936 роцї было обнаружено 27 случаїв уже мало иного типу так званої тропічной малярії, до 22 у 1037 роцї. Ниисключено, ош тропічну малярію гонні были привизти сюды из южных країн.
Ліквідація спышкы малярії має ся зачинати у перву очирідь у тых циганьськых районах, де люди и худоба живут у повному безпорядку и там ся розплодило дуже много комарув. У селах, де живут цигане, ширит ся малярія дуже сильно. Причина тому ищи ото, ош они мурувт саманы. У процисі стройкы саманы, рывут ся ямы, кутрі ся ідеальным містом для личинок маляруйных комарув.
Сякый случай из нашой исторії. Уже м писав за епідимію холеры у Сваляві и разнї епидімії, що были у Довжанському окрузі Мараморошського комітата. И причина їх появы была лише єдна – антисанітарія. Мусиме на сякых трагічных стурінках исторії учити ся, убы типирь ся всокотити. Тому додержуйме ся правил ґіґієны и карантину.
