rueпортал словник ґазета ґраматика

Честовали памнять Григōрія Тарковича

Честовали памнять Григōрія Тарковича

Честовали памнять першого єпископа Пряшовської єпархії, котрый ся родив у свалявськуй Пасіці

23 новембра у Сваляві з поводу 265-ых роковин од дня рожденя першого пряшовського єпископа Григорія Тарковича, уроженця села Пасіка (колись Березького комітату) пройшли памнятні урочистости.

Так як постава Тарковича є майменше знаною меже вызнамныма свалявчанами, тому и рішили дійство провести максимум ефективно, залучивши медіа и науковцюв.

Григорій Таркович, який родив ся у сімї сілського дяка, дустав префайноє ошколованя у Великому Варадині и Відньови, быв священником и професором Ужгородської семінарії. У 1816 р. Тарковича было назначено першым єпископом нововчиненої Пряшовської греко-католицької єпархії, хоть рукоположеный вун быв лем 17 юнія 1821 року у Краснобродському монастирі мукачовським єпископом Алексійом Повчом.

На дійство, організованоє Свалявськым деканатом МГКЄ, были покликані важні гості з Ужгорода: помочный єпископ МГКЄ Ніл Лущак, ректор Ужгородської греко-католицької богословської академії им. Бл. Теодора Ромжі, архімадрит Петро Павло Береш и знамный историк церьковли, кандидат историчных наук, доцент УжНУ Володимир Фенич.

Так як славности тыкали ся русина-свалявчанина, якый пувживота провюг на русинських землях днешньої Словакії, то гостями дійства были пряшовчани: монсеньйор професор, декан богословської факулты Пряшовського універзитету Петер Штурак, доцент, професор богословської факулты Пряшовського універзитету Ярослав Цораніч и судовый вікарій митрополичого трибунала Пряшовської архієпархії, професор Юрій Попович, уроженець села Оленьово Полянської ОТГ на Свалявщині.

Дійство пройшло у три етапы: архиєрейська Божа Служба у храмі Руздва Пресвятої Богородиці; панахида пиля меморіалної таблы-барельєфа, што на стіні Свалявського уряду, и научної конференції, яка пройшла в малому залі РБК.

На научнуй конференції з интереснов доповідьов выступив доцент УжНУ Володимир Фенич, котрый детално розказав про дітські и легінські рокы Григорія Тарковича, про становленя го карєры аж до Пряшовського періоду біографії просвітителя. А дале, гибы перейнявши естафету, словацькый колега пана Фенича професор Ярослав Цораніч розказав про живот и діятелность Тарковича, коли тот вже быв пряшовськым єпископом.

На кунци конференції організатор дійства, настоятель храму Руздва Пресвятої Богородиці, декан Свалявського деканату МГКЄ о. Александер Хваста подаровав гостьом-доповідачам книжкы Михаила Приймича «Церковний живопис Закарпаття». Володимир Фенич у отвіт такой зробив подарок організаторам дійства и бібліотеці Свалявського дома културы: свої книжкы по исторії греко-католицької церьковли Подкарпатя «Греко-католики ужгородської унійної традиції» и «Габсбурзька церква».

Далші статї из катеґōрії Даты читайте за удкликованьом
Реклама