rueпортал словник ґазета ґраматика

100 рокув Майклу Стренкови

100 рокув Майклу Стренкови

Міхал Странк (Майкл Стренк) - вояк Другої світової войны, морськый піхотинець, герой Америкы.

Міхал Странк родив ся 10 новембра 1919 рока в русинськуй фамилії у селі Ярабина (днесь район Стара Любовня, Пряшовщина). Отець му Василь Странк и мамка Марта (у дівоцтві Грофикова) были уроженцями сього села, заселеного русинами.

Отець Міхала перебрав ся в США у 1921 рокови, там вун устройив ся робити на шахту в округови Камбрія, штат Пенсилванія. Сімя злучила ся по єдному рокови, коли отець Міхала заробив гроші, жебы перевести жону и сына в Сіверну Америку из Європы. Дворучный Міхал прибыв вєдно из мамов в порт Ню-Йорка 4 августа 1922 рока на лайнері «Беренгарія».

В штатах Василь Странк быв май знамый пуд имням Чарлз. Имня малого Странка, даноє му при роджені - Міхал, было поміняно на англоязычный варіант – Майкл, фамілія – на Стренк. У 1937 рокови М. Стренк кончив школу в Франклин Боро, штат Пенсилванія, по чому вступил у Гражданскый корпус охраны окружающої среды, де робив пувдрога рока до поступленя на военну службу. У Майкла были два браты, котрі ся родили уже в Пенсилванії: Пітер и Джон, а такой сестра Мері, май мала у фамилії.

Пітер, ги и Майкл, участник Другої світової, в рокы войны служив на авіаносцьови «Франклин» в Тихому Океанови. Вун ся вернув домув из войны живым.

Майкл Стренк вступив у Корпус морскої піхоты 6 октовбра 1939 рока в Пітсбургови. По проходженю курса молодого вояка на базі морскої піхоты Перрис-Айленд в децембрі, Стренк в чині рядового быв приписаный од почтовуй службі морскої піхоты. До момента вступа США у войну Стренк служив у разных частях морскої піхоты, в тому числі на базі Гуантанамо и на авіабазі Ню-Рівер у Сівернуй Кароліні. Йому были присвоєні званя: капрала - 23 апріля 1941 рока и сержанта - 26 януара 1942 рока.

На зачатку апріля 1942 рока Стренк у составі 3-го батальйона 7-го полка 1-ої дивізії морскої піхоты быв направленый на Тихоокеанськый фронт. В составі Морскых Рейдерув, лем што сформірованої елітної части діла вчиненя наступальных и диверсіонных операцій, Стренк участвовав у бойовых дійствах на Соломоновых островах и в бойовых дійствах на острові Бугенвіль.

В януари 1944 рока Стренк дустав короткый отпуск, за час котрого змуг увидіти ся из фамилійов. По возвраті из отпуска вун быв переведеный у 2-ый батальйон 28-го полка 5-ої дивізії морскої піхоты. 28-ой полк быв созданый в февралі 1944 рока из частий морскої піхоты, участвовавшых у бойовых дійствах на Тихоокеанському фронті и розформірованых у связи из читавыма утратами. В составі свої нової части Стренк проходил пудготовку на воєннуй базі Кемп-Пендлтон и на Гавайях. В битві за Иводжиму 5-а дивізия морскої піхоты была главнов ударнов силов союзникув.

19 фебруара 1945 рока часть Стренка была десантірована из моря на южну часть острова Иводжима. По кулкох днях ожесточенных боюв америцькым частям удалось взять пуд контроль гору Сурібаты — майвысшый верьх острова Иводжимы. В першуй половині дня 23 фебруара 1945 рока шість дисантникув водворили на нюй флагшток из америцькым флагом. Поднятя першого флага было сфотографовано военным фотографом Луісом Ловері. Момент пуднятя флага збіг ся из высадков на остров міністра ВМС Джеймса Форрестола, котрый попросив дати му флаг у якости сувеніра. Командуючый 2-ым батальйоном пудполковник Чандлер Джонсон, дузнавши ся про забажанку Форрестола, отдав приказ замінити флаг другым и обязателно булшего разміра, ги тот на который поклав око Форрестол. Десантникы из части Стренка в тот час занимали ся прокладков кабеля связи коло горы Сурібаты, їм было приказано водворити новый флаг. Шість дисантникув — сержант Майкл Стренк, капраль Айра Хейз (индієць племени піко), капраль Рене Ганьон, капраль Харлон Блок, рядовый Франклин Соузлі и армійскый санітар Джон Бредлі вогрузили флаг. Пуднятя другого флага было увіковічено на подобенці Джо Розенталя.

Майкл Стренк погиб 1 марта 1945 рока, и быв єдным из трьох погибшых дисантникув из подобенкы. Точні обставины гибелі го неясні, айбо є точным, же загиб Майкл от взрыва снаряда при артобстрілови. Странк быв похороненый на теметові 5-ої дивізії морскої піхоты на Иводжимі, 13 януара 1949 рока останки го были перезахоронені на Арлінгтонському теметові у Вашингтоні. За вояцьку храбрость М.Странк быв награжденый Бронзовов звіздов (США) из літеров V за доблесть, Пурпуровым серцьом (посмертно), Пантликом учасника бойовых дійств, Медальов защитника Америкы, Медальов америцькых кампаній, Медальов Тихоокеансько-азіатської кампанії из чотырьма бронзовыма звіздами (Майкл Стренк быв награжденый сьов медалльов 5 разув), Медальов Побіды у Другуй світовуй войні.

Подобенка Джо Розенталя послужила прототипом діла сохової композиції Меморіала морскої піхоты, вчиненої Феліксом де Велдоном. Меморіал быв открытый на Арлінгтонському теметові 10 новембра 1954 рока, на 179-роковины родженя морскої піхоты США. По містичеському совпадіню се быв 35-ый день родженя Майкла Стренка, котрый ся родив тоже 10 новембра.

Майкл Стренк погиб за США, формално на момент смерти не будучи гражданином сьої страны. По законодательствови США вун мав дустати гражданство автоматическы, по тому, як отець го быв натуралізованый в 1935 рокови. Мати Майкла была натуралізована в 1941 рокови. Но сам Майкл нигда не дуставав документа про гражданство. Сесь факт упозерав в 2008 рокови сержант морскої піхоты Метт Блейс, котрый служив у охрані посольства США в Словакії. До сього момента в армійськых документах містом родженя Стренка называв ся варош Конемо в Пенсілванії, айбо в самуй Пенсілванії є пару поселень из сьов назвов. Блейс обратив ся из петиційов у Службу гражданства и имміграції США. 28 юлія 2008 рока сертифікат на гражданство Майкла быв врученый сестрі го Мері на торжественнуй церемонії у Меморіала морскої піхоты.

У 2006 рокови Клінт Иствуд зняв філм «Флагы нашых отцюв», у котрому М.Стренка зограв канадськый артист Баррі Пеппер. В основу філма лягла єднойменна книга в соавторстві Джеймса Бредлі (сына Джона Бредлі) и Рона Пауерса.

У штаті Пенсілванія, в пригороді Джонстауна, Франклин Боро, де пройшло дітвацво и юность Стренка, установленый памнятный знак в його честь. Такой в штаті Пенсілванія имням го названый муст через ріку Літтл Конемо.

Далші статї из катеґорії Особностї читайте за удкликованьом
Реклама