rueпортал словник ґазета ґраматика

Знамі америцькі Карпаторусины ІI.

Знамі америцькі Карпаторусины ІI.

Исе уже є другый за шором [першый туй] очерк про знаных людий из Карпато-Русинськой діаспоры Америкы, які прославили себе и наш народ у разных сферах: ци ôто наука, музика, спорт и так дальше. Писати за сякых людий треба и мусай. Знайме їх и бирім пример, а май главное тямім, ош є у нас свої славні люди усяды, даже и за окианом!

А май уважав сих людий, бо їх вутці и матери імігровали из Карпатськой Руси, и тяжко робили у чужому контининті май часто на шахтах и заводах, а ім удало ся добити ся вершин, тым самым прославити наш, Карпато-Русинськый народ. А май ми дуже приятно, ош лічно м знакомый из єдным из сих славных людий – Павлом Робертом Маґочійом, профессором, историком, ученым. Дуже ми было приятно мати из ним типлі бисіды и пôлучити выд нього книжкы из автографом.

ТОМАС ДЖОН ХОПКО

(28 марта 1939 року - 18 марта 2015 року)
Уродив ся Томас Хопко у Нью-Йорку, його ôтиць и мати были русинами, кутрі до іміграції жили нидалеко выд Ужгорода.
Хопко быв православным священником и богословом. Также быв диканом Свято-Владимирськой православной духовной симінарії из септембра 1992 року до 1 июля 2002 року и приподавав там догматичное богословья из 1968 до 2002 року. Кой выйшов на пінзію та носив почотное званя заслуженного дикана.

ДЖОШ КАНЗІУС

(1 марта 1944 року – 18 фибруара 2009 року)
Джош быв из Ері, штат Пенсільванія, його мати была Карпато-Русинка, родом из Подкарпатя. Извесный , ги америцькый изобритатиль, инженер по радіо и телевідінью; бывшый власник станції и опиратор радіолюбитилув (Call Sign K3TUP).
Вун вынайшов метод, котрый, по його словам, муг лічити практично вшиткі формы рака, биз побочных ефиктув и без необходимости хірургічного вмішатильства, авать лічинія. Также продемонстровав устройство, котрое з помучов радіовол ґиниріровало легкоимающый ся водоросодиржающый газ из розтвора вода-суль. У СМІ исе было названо «паліня соленой воды. Убадва ефекты свьязані из хоснованьом радіочасточного пиридатчика.

ПОЛ РОБЕРТ МАҐоЧІ

(26 янвуара 1945 року)
Уродив ся у Енглвуді, штат Ньою-Джерсі, як вун сам говорит, є на половину мадяром на половину карпато-русином. Пан Маґочі – америцькый профессор исторії, пôлітолоґії и кафидры українознавства у університиті Торонто. Робит у тому університиті выд 1980-го року и став членом Кôрулувського общества Канады. Маґочі приподавав у Гарвардському університиті и Єврийськôму університиті у Єрусалимі.
Професор выдав дуже много научных книжок по исторії карпато-русинув, українцїв и євриїв. Ныні є почесным придсидатильом Всисвітнього Конґреса Русинув.

БРЕТ МАЙКЛЗ

(15 марта 1963 року)
Брет Майкл Сичак прôфісіонально знаный, ги Брет Майкл, вун є америцькым співаком-автором пісинь и музикантом. Став знамый, ги вокаліст глеем-миталічной группы Poison, котра продала бульше 40 млн записув по вшиткôму світу и 15 млн записув лише у Зєднаных Штатах. Група также попала у дисятку синглув Тор-40 из Billboard Hot 100, включавучи шість синглув Тор-10 и сингл №1 “Every Rose Has Its Thorn”.
Брет Майклз уродив ся у городі Батлер, штат Пенсільванія. Вун має карпато-русинськое кôріня выд діда пô вутцювськуй лінії.

СТЕНЛІ ФРЕК МЮЗІАЛ

(21 новембра 1920 року – 19 янвуара 2013 року)
При народинах – Станіслав Франциск Мусіал, уродив ся у Донорі, штат Пенсільванія. Його мати была карпато-русинка, а ôтиць поляк.
Стенлі быв америцькым аутсайдером бийсбола. Вун прôвів 22 сизона у Выщуй Лізї бийсбола (MLB), играв там за Сент-Луїс Кардиналс, из 1941 року до 1944 и из 1946 до 1963 року. Щитат ся єдным из виличайшых и найбульш ліпшым нападающым у исторії бийсбола. Мюзіал быв пирвым учасником голосованя у Зал славы бийсбола у 1969 році и быв выбраный у Зал славы кардиналув Сент-Луїса у первôму класі 2014 року.

Сяка курта исторія-біоґрафія 5-тьох виликых америцькых карпато-русинув.Тямім, займе їх и уважайме! (Дале буде..)

Далші статї из катеґорії Особностї читайте за удкликованьом
Реклама