Як на Подкарпатьови сіяли коноплї

Коноплі типирькы ни стрітиме дись на городі. Їх уже ни сіє наша чилядь, убы ї хосновати так, ги хосновали ї давно наші прабабы. Пувім нарас, давно ї ни курили, (а може и курили) ни пользовали ся, ги наркотичным засобом, а сіяли іх, убы пак изробити ниткы на сорочкы и инше цуря. И для сиї ростины выділяли доста много зимли, бо они была тритя по важности пусля буль и кіндириці.

Важность коноплі пудтверджуе и ото, ош давно у газетах и журналах фурт писали за ний статті. Така стаття є, например, у Великому сельско-господарському калинендарю Подкарпатського общества наук за 1942 рук. И тоды ото было нормально и у другых частях Європы, бо ни знали тоды про єї наркотичні свойства. Например, у Франції робили из ний сироп выд кашлю. Но а у нас, в Подкарпаті, робили ниткы для цуря. Но як іх сіяла тоды наша чилядь? Як за ними позирала? Про ото и напишу. Буду ся спирати на слова професора Ивана Врабиля, котрый написав ряд статтів про сїльськое ґаздувство в Подкарпаті, а также на слова старой чиляди, що ми дуже повно інформації розказали.

Орала чилядь, ги усе, восени, а засівати зачинали посеред апреля. Кулько треба было сімена? Зависит выд того, що хотів пак здобыти ґазда, повісма, авать сімена. Про сімена сіяли фурт май нарідко. А як позирали за коноплями? В першу очирідь, промыковали бурян тай обкоповали, а пак ото робити ни треба было, бо они росли высокі и приглушовали бурян. И было дуже добре, бо коли ся пужнут та лишала ся гола зимля, де мош было садити дащо инше.

Коноплю котра сажена для повісма жали тоды, кой цвіт уже яв пропадати. Треба было ґаздам оприділяти ся спиршу, котра є для повісма, а котра для сімен, бо ни мош было чикати, кой сімена достигнут, бо тоды повісма згрублят ся и з них нич. Тому фурт было ош часть є на єдно, а часть на инше. И так ї жали, складали у снопы, а пак мочили.

Повісмо коноплі, засіяной для здобыття сімена, уже ни такой доброй якости. Тому ни добре было брати сімена из такой коноплі, убы пак сіяти на другый рук. А конопля що была налажена на повісмо давала пак чиляди полотно для кухонськых потреб, на міхы и мотузы. Про мочиння напишу у другому очерку. Пак буде…