Зима у русинськуй хыжи

Зима – ôто ни лише сяткы, и файна природа довкола нас. У давнину зима нисла и проблему, бо холода были май виликі и треба было ся гріти. Тôму, коли жоны занимали ся коноплями и ткали, а люди тым часом фурт нарабляви из дрывами, убы было типло у хыжи.

Як правило, у малинькых хыжках быв лиш єден виликый шпор, на якому варили істи и єден чôлôвік муг на ньому спокуйно спати. Муровали їх тоды из розумом, убы мош ся было удобно пользовати ним. И так вун давав типло цілуй родині. Айбо ни лише родині…

Постилі спиціально робили из виликыми лабами, убы пуд ними были ягнята и козята. И исе чиста правда! У хыжи были ґазда из ґаздыньов, їх діти, могла быти и їх старшина и вшитка мала худоба.

Ягнята, козята, кить было и тиля, усьо было у хыжи, бо у стайни бы ім было дуже студино. Жоны що жинут ся за євро модов, лиш си исе приставлявут, та падут у оморок. Айбо робити было ніщо, та и люди, и худобина были у єднуй хыжи. У стайни была май груба худоба, ги коровы, вуці, свині, бо могли май выдержати холод. И сяк было до прихода яри, прихода типлоты.

Розказала ми прабаба была исторію, ош як мати гойкала дôнці, убы ôта скоро захарила пуд ягнатями тай тилятьом, бо пуп ходит «Во Ийордана» сятити хыжі та зараз поверне до них.

Ищи плюс до куртого очерка, обращик из книжкы професора Маґочій «Народ Нивыдкы», убы сте мали уяву, як ôто было.