Ци розводили ся молодята у давнину?

Як давно жинили ся, авать выддавали ся я уже писав туй. Дуже интересна пôлучили ся інформація про читатчув. Многым типирь чунно, ош як могла ужити ся родина, де чôлôвік из жонов ни дôлюбльовали єден другого. Бо у типирішнїій час, кить щось та нарас розвод. А ци быв розвод давно? Ци могли розвисти ся молодята, кить фурт ся вадили и ни могли ся зжити?

Ôтвіт, як бы ôто ни было чунно, дав ми мадярськый архів. Так ся каже, ош у Подкарпатськуй Теритторії Мадярського Кôрулівства, у 1941 році, было проведено ряд переписув, єден из якых указує, кулько пар было розписано, кулько было вдовув/вдувцїв, кулько было розведеных. Сякый перепис быв проведеный у многых населеных пунктах, мижи якых Кирецькы и Березникы.Ôфіціальна назва перепису «Людность по роках 15 и старше за сімийным статусом».

Пувім на перед, ош станом на 1941 рук у Березниках быв ôфіціально єден розвод, а у Кирицьках ни было и єдного. Туй и є ôтвіт. И мош пувісти, ош айно, даже у тых родинах де была суєта розводув ни было. Ни розводили ся, бо давно чистовали таїнство вінчанія, ôто было ни просто так, ги типирь, пути до церкви.

Убы очерк ни быв дуже куртый, то подам Вам інформацію-ризультат тых переписув у Березниках и Кирицьках. Думаву, буде про читача исе интересно.

1. ЛЮДНОСТЬ ПО РОКАХ 15 И СТАРШЕ ЗА СІМиЙНЫМ СТАТУСОМ
   BEREZNIK
   1. ЛЮДИ
   Вшитко - 686
   Нежинаті – 214
   Жинаті – 439
   Вдувці – 32
   Розвидині - 1
   2. ЖОНЫ
   Вшитко – 773
   Нивыддані – 190
   Выддані - 480
   Вдовы - 102
   Розвидині – 1

Ризультаты видите. Єдна пара офіціально розведена.

1. ЛЮДНОСТЬ ПО РОКАХ 15 И СТАРШЕ ЗА СІМиЙНЫМ СТАТУСОМ
   KERECKE
   1. ЛЮДИ
   Вшитко - 1030
   Нежинаті – 318
   Жинаті – 677
   Вдувці – 35
   Розвидині - 0
   2. ЖОНЫ
   Вшитко – 1089
   Нивыддані – 217
   Выддані - 750
   Вдовы - 122
   Розвидині – 0

У Кирицьках розведеных ни было. Вшиткый ризультат можете прочитати. И пувім ищи рас, ош таїнство вінчанія играло вилику роль у русинськых родинах, жаль, ош типирь люди до сього так паскунно ся ставлят.